BIO & DISCOGRAFÍA

Entemedies, hubo un intento de facer una banda punkrock na que participaben dellos músicos ilustres del conceyu como Ataulfo (Cancerboy, Try Again…) Guillermo (The New Ones, Brutus…), Josmay (Brutus, SHD), Humber y Oscar pero que nun llegó a ver la lluz y que foi la semiente d’otra superbanda de punk del conceyu: THE NEW ONES, na qu’amás de Canteras, terminaron tocando Blin y Noel Miranda (Brutus, Buoi Muortu).
L’aniciu de MISIVA foi un poco raru porque venían d’un grupu más metaleru, más hardcore y, anque’l punk yera un estilu que sentían dende guah.es con bandas como Bad Religion, Offspring, Green Day o Pennywise, nun taban mui avezaos a componer ya interpretar dalgo tan “melódicu” y tan rápidu.

Los primeros temes fueron saliendo solos y pronto se dieron cuenta de que taben mui a gustu faciendo esi tipu de música. Tanto foi asina qu’al poco, tenían una riestra d’ellos y dieron el primer conciertu baxo’l nome “La Cosa Nuesa” na Capiella Los Dolores nunas fiestas de Santana (onde por ciertu, conocieron ya bautizaron a Diego como Nostic). Daquella, magar que nún tenían nome, yá sabían que diben cantar n’asturianu. Eso sí. Una de les sos señes d’identidá.

Nesa época, apuntáronse a dalgunos concursos pa poder tocar y dase a conocer y ganaron un par d’ellos. Foi ehí onde se dieron cunta de que lo que facían molaba y diba en serio. Uno d’ellos foi na Escuela de Música de Llanera que sería tamién la primer vez que coincidían colos que depués serían los sos hermanos musicales: Desakato.

Con esos premios grabaron el primer llarga duración de Misiva (2010): Parte de la Solución. Equí tenemos que parar y falar del talentu qu’hai en pueblu. El diseñu del discu, del logu, de la web y too corrió a parte de Rubonón (Rubén Fdez) y yá diba acompañalos los 15 años que duró n’activu la banda.

Nesi 2010 produzse un fechu significativu en Misiva. Medina, marcha a estudiar a China (Hangzhou) y entra al baxu Diego (Nostic) que daría un xiru de 180 graos a lo que fuera la banda hasta esi momentu. La capacidá musical, tanto a nivel instrumental como a nivel vocal de Nostic, dio-y a Misiva un emburrión que foi clave na carrera de la banda. Coros, creatividá, riffs, idees… Foi un soplu d’aire frescu ya una endición de vitalidá.

Dende ehí, lo que ye habitual nuna banda como esta. Alternancia ente períodos de composición, grabación, conciertos… Dalgunos grandes, otros pequeños. 5 discos llarga duración…

• Parte de la Solución (2010)
• Gran Mentira (2013)
• Invencibles (2015)
• En pie de Xera (2017)
• Mala Relixón (2023)

Y amás de too esto, un discu de versiones acústicas (2012), un curtiumetraxe (L’Últimu Aliendu, 2020) que ganó’l PREMIU AMAS al MEYOR VIDEUCLIP con Titi Muñoz a los mandos, y sobre too, lo que más disfrutaron: un goxáu de conciertos que quedarán na memoria pa siempre.

Viaxes per tola xeografía española, xires con bandas hermanas como Desakato, Mala Reputación… Compartir y conocer a músicos qu’almiraban como Berri Txarrak, La M.O.D.A…

Son munches coses les que la música yos-dio. Por exemplu, tocar dende países tan lloñe d’Asturies como China, hasta sitios tan piquiñinos y mundiales como Villoria (Llaviana) o Uxo (Mieres), pasando por Madrid en varias ocasiones, Barcelona, el mítico Antzoki de Bilbao, Pucela, Burgos, Santander, Cáceres, León, Valencia, Pamplona, Palencia, Orense, el Resurrection Fest de Viveiro, el Tsunami Xixón en 2 ocasiones, el Conciertu Pola Oficialidá en 3 ocasiones, la Plaza la Catedral d’Uviéu en San Mateo e incluso dalgo tan poco “punk” como l’actu institucional del DÍA DE LES LLETRES ASTURIANES en 2022 nel Teatru Filarmónica col presidente d’Asturies y los académicos d’espectadores.

Lo dicho, son munchísimes les anéctodes y les hestories que quedan na memoria de Misiva y na de la xente que los siguió y los vio en directu a lo llargo d’estos 15 años pero foi en 2023, cola publicación del EP Mala Relixón onde los 4 miembros sienten qu’esta etapa de la so vida llega al so fin.

Un cansanciu físicu, una sensación de querer zarrar una etapa y los cambios vitales propios de dir cumpliendo años, faen que Misiva decida dexar la banda y terminar la so actividá. Fueran munchos años, muches batalles y munches vivencies polo que foi’l sentir común el de facer dalgo grande pa honrar y homenaxar lo que fueron estos quince años de punk rock n’asturianu.

Asina, namás entamar 2024 anuncian “LA ÚLTIMA MISIVA”. Tres últimos conciertos onde diban despedise de los escenarios y dexar la banda nel llugar que merecía. Llangréu (FICAL), el Vidiagu Rock, festi nel qu’entamaran a facese un nome na escena, y, gracias a la sensibilidá y al sofitu del Conceyu GRAU nes fiestes de la II Flor.

Los dos primeros conciertos fueron especiales. Llangréu, sitiu mui queríu pola banda y Vidiagu, yá dexaron ver lo que sería la última Misiva. La de casa. La de Grau.

En Frontón, con un escenariu inmeyorable, col Conceyu Grau y cola HERMANDÁ DE SANTIAGU YA SANTANA sofitándolos en too momento y a 50 metros del local d’ensayu onde nacieran, zarrose’l círculu.
Tribute Against The Machine abrieron fueu y calecieron el Frontón pa que MISIVA tuviera la despidida suañada. Arropaos poles families, polos amigos, por compañeros d’otros grupos y por una montonera xente que llenó’l Frontón, fueron sonando por última vez las canciones de los de Grau. Collaboraciones que van quedar pa siempre na retina como las de los músicos moscones Miki (SHD) y Jaime (Los Ruidos), Blin (The New Ones) a la gaita, y otros de grandes grupos como Tiby (F-side, Flashback o Me Fritos), Kiko (Mala Reputación), Falu (Libre, Canto Arena) y los grandes Pablo Senator y Pepo (Desakato) llenaron el corazón de los asistentes y de los propios músicos de Misiva.

En definitiva, una nueche que lloñe de ser triste foi una celebración de l’amistá, del cariñu, de 15 años de música y de compromiso pa col asturianu que tres moscones y otru d’adopción van guardar na memoria el restu la vida.

LA DESPIDIDA SUAÑADA.